開車後BB豆豬同燒腩仔都好快瞓著，艾菲好自然都跟住一齊瞓，然後經過九曲十三彎嘅山路，飄移咗個幾鐘後我哋就到都井岬，來呢到最主要目的係睇馬，呢到係大概有300年歷史嘅御騎馬嘅保護區，佢哋全部都係野生馬無人養要自行覓食，一入場都會有職員提醒遊客唔可以餵飼。
唔知係唔係天氣太曬太熱嘅關係，D馬都要暱埋避暑呢，所以好靚嘅馬群食草情景我哋無緣見到，但有出來嘅馬就係咁樣企喺路邊，同我哋遊客D車嘅距離係超級近，而且都唔係好怕人。
BB豆豬呢一覺瞓得好甜，我哋就無打擾佢由佢繼續瞓，而燒腩仔喺我哋到咗無耐就醒，但佢都掙扎咗好一段時間先肯落車，畢竟睇電視睇書同睇實物係唔同，真係識郁嘅個心點都會有D怯，我哋都明嘅。
睇完馬，我哋就沿車路去到盡頭，米高陪BB豆豬喺車瞓，艾菲同燒腩仔上山望吓有咩睇，然後行吓行吓我哋就行咗去都井岬燈塔。
呢個燈塔，入場係要畀錢嘅，原先艾菲都猶豫咗一陣，因為無咗米高呢枝盲公竹喺身邊一齊上去，唔知上到去會點或會唔會搞錯D咩，不過同燒腩仔商量咗陣，佢堅決話想上去望吓，咁艾菲就陪仔陪到底，將身上僅餘用來買汽水飲嘅現金拎來買入場卷。
畀咗錢之後我哋就沿住長樓梯行咗上去燈塔，再經燈塔入面嘅樓梯行到上頂，上到去可以圍繞燈塔行一圈，呢到可以望到超級無敵大海景，只可惜呢日霧霾嚴重，天氣雖好但硬係有層煙霞咁，乜都睇唔清影唔靚。
睇埋燈塔我哋就離開都井岬，去咗下一站白浜海水浴場，出發前同米高商量過，雖然我哋玩唔到熱沙浴，都想帶燒腩仔同BB豆豬去沙灘玩吓沙，於是米高就安排咗呢個景點畀我哋，又由於要避開猛烈嘅太陽，我哋差不多五點黃昏時份先到。
雖然米高一早講定日本沙灘係乜設施都無，但艾菲無諗過係連人影都唔多隻，仲要停車場同海邊鋪頭都無開（應該要weekend有遊客先會開），感覺好似怪怪地咁，然後我哋鋪好地蓆放低嘢無耐，終於有個類似救生員嘅人出現，話畀我哋知沙灘六點閂門，OKOK...咁玩一陣就走囉...
話晒人在外地，對住個又係太平洋，艾菲一早已經好firm咁同燒腩仔講明唔可以落水（戲山莫戲水嘛），所以佢哋兩個一來到就自動波坐低玩沙，完全無request過出去裝水，又套Daiso迷你玩沙玩具幾抵玩，100yen有齊6件工具兼夠實淨唔係深水埗cheap貨一玩就爛。
難得來到沙灘，燒腩仔當然係自動波埋位，仲好哥哥咁示範畀BB豆豬知點玩。
至於第一次玩沙嘅BB豆豬，艾菲要畀十個叻佢，除咗起初有D驚桔腳要艾菲抱，話都無咁快就適應咗個質感，坐低四圍望，再跟住哥哥玩，你一吓我一吓咁玩沙。
warm up一陣大家都進入狀態，心情大好齊齊笑住望鏡畀艾菲影相，真係抵錫﹗然後玩到六點我哋就聽話執嘢走，上車前艾菲用一早預備咗嘅大盒爽身粉同佢哋拍走D沙，第一次用果然係work話咁快就乾淨晒無沙黐住。
離開沙灘我哋先返酒店放低D嘢再出去搵食，原先想試宮崎站嘅雞料理，點知遇著包場無得食，所以又要專登出車出去，正當我哋毫無頭緒唔知食咩心急搵路之際，忽然燒腩仔喺後面爆咗句「你用gogomeow咪得囉」，聽完艾菲真係忍唔住爆笑咗出來，話說前一晚去食扭蛋壽司時，架車個GPRS唔知做咩搵唔到路，艾菲唯有開自己電話嘅google map出來畀米高跟住行，於是佢就記住google map係用來搵路，但就記錯咗以為佢叫gogomeow囉，kakaka...
跟住我哋兜咗好耐，都搵唔到食咩好，眼見BB豆豬同燒腩仔開始扭肚餓，心急嘅米高於是求其㨂間壽司鋪就衝入去，跟住有一個粗心大意嘅爸爸，唔小心倒瀉咗杯熱水落個仔身上，然後呢個超好戲嘅仔即浮誇地喊到全間壽司鋪都聽到，嚇到爸爸事後內疚主動話請佢食冰芒果甜品作補償，雖則艾菲一睇就知隻奸豬仔一D嘢都無，但難得燒腩仔成功呃到爸爸上當，艾菲都無謂掃興阻燒腩仔食好嘢啦，呢D男人間嘅情趣艾菲識乜吖。
呢晚係我哋最後一晚喺九州，第二日我哋就要飛東京，所以無論如何都要盡早返酒店執行李，不過上房前艾菲都係心思思走咗去車站7-11一轉，買咗呢杯Haagen-Dazs期間限定日向夏味雪糕，為九州最後一晚宵夜作一個完美落幕。
九州東京之旅~Day1 HK>福岡
九州東京之旅~Day2 福岡 part1
九州東京之旅~Day2 福岡 part2
九洲東京之旅~Day3 由布院>佐賀
九州東京之旅~Day4 佐賀>鳥棲 part1
九州東京之旅~Day4 佐賀>鳥棲 part2
九州東京之旅~Day5 福岡>鹿兒島 part1
九州東京之旅~Day5 福岡>鹿兒島 part2
九州東京之旅~Day6 鹿兒島 part1
九州東京之旅~Day6 鹿兒島 part2
九州東京之旅~Day7 鹿兒島>宮崎part1
九州東京之旅~Day7 鹿兒島>宮崎part2
九州東京之旅~Day8 宮崎part1
沒有留言:
張貼留言