來到鹿兒島已經天黑，所以匆匆喺酒店放低行李，準備好BB豆豬嘅晚餐，我哋就出去搵食，來到城市地方，我哋習慣唔揸車（怕塞車），順便畀燒腩仔試吓坐鹿兒島電車，電車男對我哋呢個安排當然係相當滿意。
電車來到鹿兒島站我哋就落車，沿住一條暗黑長街行去黒かつ亭，呢到係專門食吉列薩摩黑豚嘅餐廳，米高係睇Yahoo Japan介紹搵到呢到，來到發現都幾多香港人，餐廳地方唔大但當晚至少有兩枱係講緊廣東話，我哋被安排坐喺tatami位，自成一角唔使怕燒腩仔同BB豆豬嘈到其他人。
快手餵飽BB豆豬就到我哋開餐啦﹗左邊係米高嘅吉列黑豚定食，右邊係艾菲嘅吉列海鮮定食，除咗超級好味艾菲都唔識點形容佢哋啦，尤其係個吉列帶子，第一啖唔識就咁食覺得平平無奇，第二啖試吓點D鹽個鮮味即刻走晒出來﹗推介推介呀﹗
開開心心食咗餐好，臨走喺門口影返張到此一遊先。
之後我哋就沿路行返出去鹿兒島站坐摩天輪，其實出發前艾菲都問過米高有無得安排畀燒腩仔坐吓摩天輪，皆因喺香港燒腩仔每次經過中環都話想坐，但每次D時間都唔啱坐唔成，雖然米高一直無答實艾菲，不過一落電車見到咁大個摩天輪，佢都即時上網check吓營業時間，然後就安排大家食完飯後去坐。
我哋食完飯，摩天輪下面D百貨公司都已經閂晒門，所以要坐電梯直上摩天輪樓層，以為要等點知原來人影都唔多隻，每個大人1000yen，小學生以下幼兒免費，買完飛入場D職員就問我哋使唔使坐比卡超專車，見反正無人等又唔使加錢咪話坐。
一打開車廂入去，發現除咗外面嘅裝飾，入面係乜嘢比卡超嘅裝飾都無，好彩我哋無人係比卡超fans，否則肯定好失望。
摩天輪慢慢升上去，燒腩仔最開心應該係見到佢此行不停嘈住好想坐嘅新幹線列車。
當然唔少得鹿兒島嘅夜景，據講朝早上來遇著好天的話係可以見到櫻島火山。
坐完摩天輪，我哋就過返鹿兒島站對面嘅AEON超市買餸，準備定來緊兩日BB豆豬嘅早午晚三餐，簡簡單單有早餐麵包，BB乳酪，佢至愛嘅烏冬，本菇，沙律菜，免治牛肉，除咗免治牛內要預早一晚煮定，其他都係第二朝放入炆燒壺焗一陣就食得，方便又好味。
而自少熱愛卡樂B嘅艾菲，來到日本當然要掃吓薯片，不過宜家好多味其實都可以喺香港買到食到，所以今次只攻香港無見過嘅口味，呢晚就畀艾菲買到wasabi味波浪薯片，仲有之前見過人推介嘅魚翅同鮑魚味杯麵。
喺超市買完嘢，我哋仲諗住坐返電車返酒店，點知去到車站先知尾班車已走，無選擇嘅情況下只好坐的士返去，搞掂兩個小朋友沖涼瞓覺，又係艾菲同米高密密洗嘢pack嘢嘅時候，辛苦完一大輪當然又到大人嘅宵夜時段，呢晚我哋終於試埋固力果水果冰最後一隻味白桃味，艾菲亦試咗來到九洲必食嘅白熊練奶冰，練奶刨冰連埋冰水果一齊食堅係正正正，絕對係一食難忘﹗
九州東京之旅~Day1 HK>福岡
九州東京之旅~Day2 福岡 part1
九州東京之旅~Day2 福岡 part2
九洲東京之旅~Day3 由布院>佐賀
九州東京之旅~Day4 佐賀>鳥棲 part1
九州東京之旅~Day4 佐賀>鳥棲 part2
九州東京之旅~Day5 福岡>鹿兒島 part1
沒有留言:
張貼留言