有過上年嘅經驗，都知道東涌等巴士入大澳條人龍會好長，所以今次專登提早出門，十一點到東涌諗住排一個鐘實上到車，但去到先發現條人龍比上年更誇張，已經排到去東涌地鐵站出面（噴水池隔離），仲要喺空地打蛇餅兜幾個圈，我哋都係巴士公司職員幫手先搵到條隊尾﹗﹗﹗好彩燒腩仔都叫合作，帶佢去睇吓噴水池，同佢食吓零食，畀架車仔佢玩吓就OK，反而艾菲喺等車期間先發現唔記得拎相機，勁唔開心超想發難叫唔去﹗
等咗差唔多兩個鐘先上到巴士﹗不過無上到直衝落山架巴士都已經好好彩啦（我哋應該係後幾班車，啱啱睇住D消防員救人）﹗一落車燒腩仔就勁興奮，因為有幾架佢未見過嘅藍色的士停咗喺的士站，佢仲因為咁開心咗成日添呀﹗小朋友就係咁簡單﹗
之前幾次去大澳都係悠悠閒閒，可以好舒服咁四圍行吓，但今次行入去就只係見到人同人，D鋪頭想話行埋去望吓嘢都難，令有人群恐懼症嘅艾菲好不爽，再加上無帶相機實在無乜心機影相，只係求其用iphone影張棚屋相就算。
求其搵間茶餐廳坐低餵飽燒腩仔（十點食完早餐，等到兩點幾先有得食午餐，好彩佢真係好乖無投訴），我哋向住大澳文物酒店行入去，路過見到D又大又橙嘅咸蛋黃，一場來到梗係要畀燒腩仔見識吓啦﹗
之後見到佢近期好like嘅郵政局，㩒郵票機㩒到唔願走，不過行到少林寺附近遇見mini消防車又無乜興趣咁喎。
跟住經過紅樹林，影出來好似幾靚，但實情係成個樹林底都係垃圾，點解D人可以咁無公德心？宜家香港D公民教育真係咁差？
不過小朋友又點會介意D垃圾吖，好努力咁邊行邊搵蟹睇。
經過蝦醬廠見放咗D蝦膏同蝦醬出來曬太陽，又畀燒腩仔埋去望吓聞吓。
然後見到好多人走去石灘到摸蜆，我哋唔敢畀燒腩仔玩呢D嘢，但就帶佢行咗上個似爛未爛嘅堤霸到影相，呢D位真係好嬲自己點解明明拎咗個相機出來都會唔記得放落袋囉，有相機就可以影到靚相啦﹗ iphone同相機影出來嘅quality真係差好遠呀﹗
之後上咗新開嘅大澳文物酒店，保留咗舊警署嘅原貌，外邊放咗D凳喺到畀遊客坐，二樓就係間餐廳有早午晚餐同下午茶餐提供。
我哋仲呃咗燒腩仔入去拘留室到坐添﹗kakaka...突然米高收到email，話要坐低做D公司嘢，我哋兩母子就好無奈咁陪佢喺到呆坐咗成半個鐘...
玩到六點日落就走啦﹗燒腩仔行行吓忽然同米高講「我無力」，跟手就爬咗上米高身要佢抱，而成日無瞓過晏覺嘅佢，喺米高嘅懷抱吓好快就瞓著。
雖然全程都無咩mood，但臨走點都要掃吓街先安樂，今次簡簡單單只係試咗大大粒魚蛋（宜家唔使去長洲都有得食啦，仲要檔檔都有得賣咁滯），無食豆腐花同燒魷魚，但就有飲每次來都一定會飲嘅紫貝天葵。
來嘅時候我哋等咗兩個鐘車，走嘅時候都估到坐巴士出東涌條人龍唔會短，但點都估唔到條龍係長到完全見唔到尾，幾乎沿住河排到去屋邨咁滯，估計要等30班車先有機會上到車，即分分鐘等到九點先走到，十點先出到東涌食飯，而等的士條人龍亦唔見得短兼且一直無車來，最終我哋決定轉陣改坐巴士出梅窩再轉船返市區（好彩及早轉態，遲半個鐘條龍已經長到去新開嘅觀光橋啦），結果等咗一個鐘巴士就可以離開大澳，趕到八點船出中環，而唔使煩有人幫佢安排好晒嘅燒腩仔，上到船仲有心情同米高齊齊歎零食，難為艾菲坐車坐到有D暈車浪，想嘔完全無胃口呢！
沒有留言:
張貼留言