因為燒腩仔呢朝未八點已經起身，in完食埋飯都差唔多進入無電mode，所以我哋活動未開始就入場睇吓玩得幾多得幾多，入到去已經放晒D消防車喺到畀人睇，我哋就逐架逐架埋去望，叫燒腩仔影吓相咁，不過佢可能無諗過D消防車入面有人啦，所以消防員叔叔喺車到走落來時，佢嚇到即刻想走佬。;P
行咗陣見呢個消防車彈床泵好氣就即刻拉燒腩仔埋去玩（未set好時艾菲仲以為係示範跳樓用D氣墊添呀），好彩我哋早去早排隊，第二round已經到佢。
彈床入面都有幾多機關玩㗎，不過燒腩仔入到去其實行都行唔穩，只係全程留咗喺門口位到跳，不停跌低又不停爬起身繼續跳，keep住十分鐘都唔覺悶仲勁hyper，難為負責照顧佢個消防員叔叔就要不停扶佢起身，怕佢畀其他小朋友踩親。
玩完彈床出來就見到呢架玩具消防車，成班小朋友又撲晒埋去追住架車，個個都諗住霸個靚位幫手推車，但架車其實係由企喺遠處嘅消防員叔叔搖控㗎囉，kakaka...
之後同咗燒腩仔排隊上救護信息消防車，又同真人扮嘅吹氣救護員影吓相， 佢一舊雲咁都唔太知發生緊咩事，不過負責嘅救護員哥哥都好nice，猛同燒腩仔傾偈。
跟住又拉佢去扮吓紙板消防員同救護員啦，依？睇落都入形入格咁喎﹗
等咗陣，D消防員叔叔見越來越多小朋友入場，就拎咗袋小朋友消防員衫出來畀小朋友扮消防員，起初燒腩仔見其他哥哥姐姐著住來影相都話OK肯著㗎，點知排到佢時居然喊晒口話唔著，好彩艾菲最後成功用架車仔氹到佢著，著上身時仲黑晒面唔願畀我哋影相㗎，不過D消防員叔叔氹吓佢又OK勉強畀咗個一號笑容出來。
因為個場其實仲未完全set up晒，本來我哋都想留低玩多陣，等埋D消防員叔叔print返張扮消防員相畀我哋先走（艾菲仲專登讓咗個靚位畀消防員叔叔影相添），不過要等一個鐘實在太耐，燒腩仔已經扭眼瞓扭到開始失控，我哋唯有放棄張相提早徹退啦﹗
沒有留言:
張貼留言