燒腩仔揮春

為咗燒腩仔，艾菲到底可以去到幾盡呢？事實一次又一次證明，艾菲都可以幾癲吓，繼之前嘅紙廚房之後，艾菲又通咗幾晚頂密密趕工整咗D燒腩仔揮春出來送禮自用，仲要明明唔識用photoshop，之前返工有得學都懶得學，最後居然係為咗個仔而自學成功...

話說12月尾一月初嘅某日係facebook見到個studio廣告，promote影新年相加揮春制作嘅package，睇咗D sample覺得幾得意同幾靚，但睇埋價錢就知艾菲一定唔會幫襯，本來都唔記得咗呢件事，不過後來路過快圖美見到有得印相片揮春又勾返起條根，其實$28兩張揮春都頗吸引的，不過艾菲始終覺得佢D款唔係咁啱feel，重點係佢不過就咁key張相落去然後印出來，連底都唔會幫你去感覺有D hea，於是pat pat痕決定試吓自己整。



要整相片揮春，首先要有靚相，正當艾菲想同燒腩仔影相時，佢咁啱就病咗成個星期，好返之後又想等燒腩仔公公同佢剪咗頭髮先影，到剪完頭髮就輪到呢個小朋友玩自殘抓到額頭出現血痕唔見得人，結果一拖再拖就拖到上星期先得閒同佢影。



為咗呢輯相，艾菲原先準備咗三套衫同一大堆道具，包括風車，金元寶，利是封，錦鯉掛飾，Wii個太鼓等，結果呢個燒腩仔超唔合作，第一次得艾菲單挑用腳架同佢影時，佢不停走出鏡頭之外等艾菲捉佢捉到手軟，又係咁呃艾菲餵佢食堤子干，連個風車都未影到入鏡已經畀佢撕爛咗，後尾仲影影吓突然爆喊添﹗



見佢狀態咁差艾菲都唔敢勉強再影落去，唯有等夜晚米高放工返來先再來第二round，今次艾菲除咗堤子乾，仲準備咗《Mickey Mouse Club House》畀佢睇，又試過用有色膠紙係地下貼個正方形畀佢當玩咁企入去，結果佢唔係撲過來搞鏡頭同電腦，就係踎係地下試圖摵返D膠紙出來，搞咗個幾鐘都唔係好影到啱心水嘅靚相，到最後艾菲直情採取放棄嘅態度，求其畀條牙仔餅過佢食住來影算...



完成影相呢part就輪到執相同photoshop整揮春呢part，雖然係勉強收貨，都好好彩咁揀到幾張相出來用，不過因為艾菲係個photoshop新手，整嘅過程就有D波折浪費咗唔少時間，淨係搵D有關揮春嘅免費素材來裝飾個揮春都搞咗幾晚，勾返燒腩仔個樣出來唔要個底又用咗一晚，試吓位試吓色就無咗一晚，最後真係砌個揮春出來都整咗一晚，通咗幾晚頂睇到眼都花之後先終於完成八張揮春，而上面呢張福艾菲就有少少唔滿意，因為整嘅時候唔識將佢變成菱形咁整，結果要見到製成品先見到燒腩仔坐歪咗...



整好揮春就到印出來呢一part啦，原先艾菲諗住印落相紙再cut出來就最簡單，不過後尾見到Blogger Yennie Darkins個facebook page post咗上面個video，發現用PVC膠（文具鋪話佢哋叫牆貼）雖然多一重工序，但成本肯定比用相紙低，反正艾菲只係試玩性質唔算大量製作，就決定跟呢個方法整。



艾菲原先只係諗住整三set，一set畀燒腩仔婆婆，一set畀燒腩仔嫲嫲，一set就自己用，點知燒腩仔姨媽知道之後又話想要一set，連燒腩仔舅父都話想要一張，於是艾菲就要由原先整24張變成整33張揮春，逐張逐張貼PVC膠再cut出來都咪話唔甘，好彩艾菲以前係舊公司慣咗一腳踢連庶務都要自己做，已經有晒做工廠妹嘅經驗，所以只係用咗兩晚就全部cut好，趕得切係食團年飯時交到燒腩仔婆婆手上，嘻...佢見到製成品勁開心呀，仲即刻貼到成屋都係添，連燒腩仔瞓醒晏覺見到都好開心呢，見到佢哋滿意嘅表情，艾菲就覺得自己所有嘅付出係都係值得㗎﹗